पीसीआर जाँच शुल्क दुईहजार भन्दा बढी लिए कारबाही

रासस-
काठमाडौं, वैशाख १४ गते ।

स्वास्थ्य तथा जनसंख्या मन्त्रालयले कोभिड–१९ को पीसीआर परीक्षण शुल्क बढी लिने प्रयोगशालालाई कारवाही गर्ने भएको छ ।

मन्त्रालयका सहप्रवक्ता डा. समीरकुमार अधिकारीले आज सूचना जारी गर्दै पीसीआरको शुल्क बढी लिने गरेको जनगुनासो मन्त्रालयमा प्राप्त भएकाले त्यस्ता प्रयोगशालालाई कारवाही गरिने जानकारी दिए ।

उनका अनुसार बढी लिएको पाइएमा राष्ट्रिय जनस्वास्थ्य प्रयोगशालामार्फत ती प्रयोगशालालाई परीक्षणको सूचीबाट हटाइने छ ।

मन्त्रालयले सरकारी प्रयोगशालालाई रु एक हजार र निजी प्रयोगशालालाई पीसीआर परीक्षण शुल्क रु दुई हजार तोकेको छ । रासस