नेपालमा आज थप ६०३ जनामा कोरोना संक्रमण, ३ जनाको मृत्यु

टुडेपाटी-
जनकपुरधाम, वैशाख १ गते ।

कोरोना महामारीको दोस्रो लहर चलिरहँदा नेपालमा थप ६०३ जनामा कोभिड–१९ पुष्टि भएको छ । स्वास्थ्य तथा जनसंख्या मन्त्रालयका अनुसार बुधबार देशभर ४२ सय ८९ वटा पीसीआर परीक्षण गर्दा ५८० जना र ४५१ वटा एन्टीजेन परिक्षण गर्दा २३ जनामा कोभिड पुष्टि भएको हो । 

कोभिड–१९ पुष्टि हुनेमा काठमाडौँका १७३ जना, ललितपुरका ६१ र भक्तपुरका २० जना रहेका छन् । यो सँगै कुल संक्रमितको संख्या २ लाख ८१ हजार ५८७ जना पुगेको छ ।

त्यस्तै ३ जना कोरोना संक्रमितको मृत्यु भएको छ भने हालसम्म नेपालमा कोरोना संक्रमित मृतकको संख्या ३ हजार ६१ पुगेको हो ।

त्यस्तै बुधबार थप १७३ जना संक्रमित निको भएका छन् । यो सँगै नेपालमा निको हुनेको संख्या २ लाख ७४ हजार ४४७ जना पुगेको मन्त्रालयले जनाएको छ । हाल आइसोलेसनमा चार हजार ५६ र क्वारेन्टीनमा ७८ जना रहेका छन् ।