बेपत्ता झा दम्पतिको अझै पत्ता लागेन, शंकास्पदहरुसंग सोधपुछ गर्दै प्रहरी

टुडेपाटी-
जनकपुरधाम, फागुन ११ गते ।

महोतरीमा बेपत्ता दम्पतिको अझै पत्ता लागेको छैन । प्रहरीले बेपत्ता दम्पतीको विषयमा प्रहरीले शंकास्पद व्यक्तिहरुसंग सोधपुछ गर्ने कार्य तिव्र पारेको छ । शंकास्पद व्यक्तिहरुलाई बोलाएर बेपत्ता दम्पतिको खोजअनुसन्धानको लागि सोधपुछ गरिरहेको महोत्तरीका प्रहरी उपरीक्षक टीकाबहादुर केसीले जानकारी दिए ।

‘अनुसन्धानको लागि केहि शंकास्पद व्यक्तिलाई बोलाएर सोधपुछ गरिहेका छौं । पक्राउ अहिलेसम्म कसैलाई गरिएको छैन । खोजविन तिव्र पारेका छौं’ उनले भने ।

विवादित जग्गाको मुद्दामा अदालतमा साक्षी बसेका पिपरा गाउँपालिका –५ सहोडवाका ६५ वर्षीय मोसाफिर झा र उनकी श्रीमती ६० वर्षीय गिता देवी झा सोमबार राति सुतेकै ठाउँबाट वेपता भएका छन् ।

राति खाना खाएर ११ बजे छुट्टाछुट्टै कोठामा सुतेका झा दम्पति बिहान ओछ्यानमा नदेखेपछि र ओछ्यान नजिक रगतको छिटादेखेपछि परिवारजनले प्रहरीलाई खबर गरेको थियो ।

रगतको छिटाले घटना शंकास्पद बनेको र दुबैजनाको अपहरण भएको हुन सक्ने भन्दै स्थानीयले यथासिघ्र खोजविन गरिदिन बिहानैदेखि जनकपुर जलेश्वर सडक खण्ड अवरुद्ध गरेका छन् । यधपि सडकको दुबै छेउबाट गाडी चलिरहेको महोत्तरीका प्रहरी उपरीक्षक केसीको भनाइ छ ।

झा मालपोतका अवकाश प्राप्त कर्मचारी हुन् । एक मोहि जग्गा विवाद मुद्दामा साक्षी बसेका झासंग विपक्षीसंग केहिदिन अघि झाको विवाद भएको थियो ।