विश्वका सय प्रभावशाली महिलाको सुचीमा परेकी सपनाले बस्नेतविरुद्ध दिइन् उजुरी

टुडेपाटी-
काठमाडौं, फागुन २ गते ।

विश्वको एक सय प्रभावशाली महिलाको सुचीमा परेकी सपना रोका मगरले आफूलाई अभद्र व्यवहार भएको भन्दै प्रहरीमा उजुरी दिएकी छन् ।

मगरले आइतबार महानगरीय प्रहरी परिसर काठमाडौंमा विनयजङ्ग बस्नेत विरुद्ध उजुरी दर्ता गराएकी हुन् ।

अभद्र व्यवहार सम्बन्धी मुद्दा आज बिहान दर्ता गराएको महानगरीय प्रहरी परिसरका प्रमुख एसएसपी अशोक सिंहले बताए ।

‘उहाँको उजुरी आइसकेको छ । अहिले जसको विरुद्ध उजुरी दिएको हो उनी काठमाडौं बाहिर रहेको बुझिएको छ । हामीले अनुसन्धान अगाडी बढाइसकेका छौँ,’ एसएसपी सिंहले भने ।

बस्नेतले आफूसँग सपनाको अश्लील फोटोहरू भएको र सार्वजनिक गर्ने धम्की दिँदै आएका थिए । उनले विभिन्न युटुव च्यानलमा फोटोहरू सार्वजनिक गर्ने अन्तर्वार्ता दिएका थिए। त्यसैलाई आधार बनाएर सपनाले प्रहरीमा अभद्र व्यवहारमा उजुरी दिएकी हुन् । प्रहरीले पक्राउ पुर्जी लिएर बस्नेतलाई पक्राउ गर्ने तयारी गरेको छ ।

१८ वर्षीय सपना बेवारिसे शव व्यवस्थापन गरेको कारण सय विश्वका एक सय प्रभावशाली महिलामा पर्न सफल भएकी थिइन् । बस्नेत पनि उनीसँगै शव व्यवस्थापनमा खटिँदै आएका थिए । पछिल्लो समय उनीहरूबीच सम्बन्ध बिग्रिएपछि बस्नेत बदनाम गर्दै आएका छन् ।