अब कोरोना संक्रमितको उपचार सरकारी अस्पतालमा मात्रै हुने, घट्यो परीक्षण शुल्क

टुडेपाटी-
काठमाडौं, माघ २९ गते ।

अब कोरोना भाइरस संक्रमितको उपचार सरकारले सरकारी अस्पतालमा मात्रै हुने बताएका छन् ।

यसअघि स्वास्थ्य मन्त्रालयले सूचीकृत निजी अस्पताल तथा मेडिकल कलेजहरुमा भर्ना भई उपचार गरेकाहरुको हकमा बिहीबारको मितिले १० दिनसम्मको मात्रै सोधभर्ना गर्ने स्पष्ट पारेको छ ।

स्वास्थ्य मन्त्री हृदयेश त्रिपाठीको उपस्थितिमा आज बसेको आइसिएस कमाण्ड बैठकले कोभिड–१९को उपचारका लागि सूचिकृत निजी अस्पताल तथा मेडिकल कलेजबाट गर्ने प्रक्रिया समेत स्थगित गरी सरकारीमा मात्रै गर्ने निर्णय गरेको हो ।

यस्तै सरकारले पीसीआर विधिबाट गरिने कोभिड–१९ परीक्षण शूल्क घटाएको छ ।

सरकारी प्रयोगशालाहरुमा कोभिड–१९ परीक्षणको शुल्क घटाएर एक हजार रुपैयाँ निर्धारण गरिएको मन्त्रालयका प्रवक्ता डा. जागेश्वर गौतमले बताए । कोभिड–१९ को रोकथाम तथा नियन्त्रणको सम्बन्धमा बिहीबार बसेको आइसीएसको बैठकले निर्णय गरेको हो ।

यसअघि कोरोना परीक्षणको शुल्क दुई हजार तोकिएको थियो ।