भंगहा मेयर गोल्डकप : झापालाई पराजित गर्दै एपीएफ क्लब सेमिफाइनलमा प्रवेश

टुडेपाटी-
महोत्तरी, माघ १८ गते ।

महोत्तरीको भंगहामा दोस्रो दिन भएको मेयर गोल्डकप फुटबल खेलमा विभागीय टिम नेपाल एपीएफ क्लब काठमाडौं विजय भएको छ ।

झापा सातासीधामलाई ‘सडन डेथ’मा पराजित गर्दै एपीएफ क्लब मेयर गोल्डकप प्रतियोगिता २०७७ को सेमिफाइनलमा प्रवेश गरेको हो ।

दोस्रो क्वाटरफाइनलमा एपीएफले ‘सडन डेथ’मा ७-६ गोलको अन्तरले विजयी बनेको हो।

त्यसअघि निर्धारित ९० मिनेटको खेल १-१ गोलको बराबरीमा टुंगिएको थियो । खेलमा उमेस राईले गोल गर्दै ५१अौं मिनेटमा सातासीधामलाई अग्रता दिलाएका थिए।

तर ६१अौं मिनेटमा नवी लामाको गोलमार्फत एपीएफ खेलमा फर्किएको थियो । खेलमा उत्कृष्ट प्रदर्शन गरेका एपीएफका नवि लामा म्यान अफ दि म्याच पाएका छन् ।

अब एपीएफले फाइनल प्रवेशका लागि माघ २२ गते विजयी युथ र बागमती युथ बिचको खेलको विजेतासँग प्रतिस्पर्धा गर्नेछ।

विजयी र बागमती बिचको खेल यही माघ २० गते रहेको छ।

भोलिको खेल लेखनाथ पोखरा र महोत्तरीको बेङ्खारी टीमबीच हुने अायोजकले जनाएको छ ।