बटेश्वर सहित देशका सबै वडामा सरकार विरुद्ध काँग्रेसको प्रदर्शन, ओली विरुद्ध यस्तो नारा लगाइयो

टुडेपाटी

बटेश्वर, माघ ८ गते ।

प्रतिनिधिसभा विघटनको विरोधमा नेपाली काँग्रेसले प्रदेश २ सहित देशभरका सबै वडामा प्रदर्शन गरेको छ ।

‘संसद पुनःस्थापना गर, अधिनायकवाद मुर्दाबाद, केपी ओली मुर्दाबाद, केपी ओली राजीनामा दे, भ्रष्ट सरकार मुर्दावाद, दुःख पाए साराले केपी तिम्रै पाराले’  लगायतका नारा लगाउँदै काँग्रेसले धनुषाको बटेश्वर गाउँपालिका लगायत देशभरका ६ हजार ७४३ वडामा प्रदर्शन गरेको हो ।

यसैबीच बटेश्वर गाउँपालिका वडा नम्बर १ बाट निस्केको विरोध जुलुस वडाका विजयपुर, चित्रपुर लगायतका विभिन्न टोल हुँदै कार्तिकुमर बजारमा कोणसभामा परिणत भएको थियो ।

कोणसभालाई सम्बोधन गर्दै वडाध्यक्ष शैलेन्द्र महतोले प्रधानमन्त्री केपी शर्मा ओलीले संसद विघटन गरी लोकतन्त्र र संविधानको हत्या गरेको बताउँदै ओली विरुद्ध सम्पुर्ण जनतालाई संघर्षमा उत्रिन आह्वान गरे ।

काँग्रेसकै अर्का स्थानीय नेता अशोक महतोले प्रधामन्त्री ओलीको गैर संवैधानिक कदमले मुलुक ठूलो दुर्घटनामा फसेको बताए । प्रधामन्त्री ओलीले जमतको अपमान गरेको भन्दै उनले ओलीको यस्तो अक्षम्य अपराध विरुद्ध सबै दल र जनता एकजुट हुनुपर्ने बताए ।

प्रधानमन्त्रीको कदमलाई असंवैधानिक भन्दै कांग्रेसलले यसअघि पुस १३ गते १६५ निर्वाचन क्षेत्रमा, पुस २५ गते ३३० प्रदेश सभा निर्वाचन क्षेत्र र माघ ३ गते ७५३ पालिकाहरुमा विरोध प्रदर्शन गरिसकेको छ।