प्रचण्ड-नेपाल पक्षले संसदीय दलको नेताबाट मुख्यमन्त्री राईलाई हटाएर आचार्यलाई चयन

टुडेपाटी-
विराटनगर, पुस १६ गते ।

प्रदेश नम्बर १ का मुख्यमन्त्री शेरधन राईलाई प्रचण्ड-माधव समूहले नेकपा संसदीय दलको नेताबाट हटाएको छ । आइतबार अविश्वासको प्रस्ताव दर्ता गराएको प्रचण्ड(माधव समूहले राईलाई दलको नेताबाट पनि हटाएको हो ।

अविश्वासको प्रस्ताव दर्ता भएपछि मुख्यमन्त्री राई संसदीय दलभित्र अल्पमतमा छन् । अल्पमतमा परेका राईलाई हटाएर दलको नेतामा भीमप्रसाद आचार्यलाई चयन गरेको हो ।

संसदीय दलको बैठकबाट दलको नेताबाट राईलाई हटाएर आचार्यलाई चयन गरेको पत्र प्रदेशसभा सचिवालयमा बिहीबार बिहान दर्ता भएको छ ।

मुख्यमन्त्री राईलाई हटाएर भीमप्रसाद आचार्यलाई दलको नेता चयन गरेको पत्र सचिवालयमा दर्ता भएको प्रदेशभसभा सचिव गोपालप्रसाद पाराजुलीले जानकारी दिए । उनका अनुसार सचिवायलमा दलका उपनेता टङ्क आङ्बुहाङले पत्र दर्ता गराएका हुन् ।

मुख्यमन्त्रीलाई दलको नेताबाट हटाइएको पत्रमा ३६ जनाको हस्ताक्षर छ । आइतबार प्रदेशसभाका ३७ सांसदले मुख्यमन्त्री शेरधन राईविरुद्ध अविश्वासको प्रस्ताव दर्ता गराएका थिए । तर मुख्यमन्त्रीविरुद्ध अविश्वासको प्रस्तावदर्ता गरेकी सांसदल कला घले कित्ता परिवर्तन गर्दै ओली समूहमा लागेकी छन् ।

प्रदेश १ मा ९३ जना सांसद छन् । जसमा नेकपाको मात्रै ६७ जना छन् ।