उखु किसानको समर्थनमा जिप्रका सप्तरी अगाडि एक घण्टा धर्ना

शुभ नारायण यादव-
सप्तरी, पुस २ गते ।

उखु किसानले जारी राखेको आन्दोलनप्रति ऐक्येवद्धता जनाउँदै सप्तरीका अगुवा किसानहरुले जिल्ला प्रशासन कार्यालय अगाडि एक घण्टा धर्ना दिएका छन् ।

जनता समाजवादी पार्टी निकट किसान संघको अगुवाईमा जिल्ला प्रशासन कार्यालय सप्तरी अगाडि बिहीबार मध्यान्ह १२ बजेदेखि १ बजेसम्म उनीहरुले धर्ना दिएका हुन् ।

उखु किसानहरुको वक्यौता रकम भुक्तानी गर्नुपर्ने, धानको समर्थन मूल्य लागु गर्नुपर्ने, किसानलाई समयमा मल, खाद, बीऊ सहुलियत दरमा उपलब्ध गराउनुपर्ने लगायतका विभिन्न मागहरु अघि सार्दै किसान सङघले धर्नामा बसेका थिए ।

किसानहरुको समस्याप्रति सरकारले ध्यान नदिएको तथा उखु किसानहरुको मागलाई सम्वोधन गर्न ढिलाई भईरहेकोले दवाब स्वरुप आफुहरुले धर्ना कार्यक्रमलाई अगाडि बढाएको युवा नेता एव आन्दोलनका अगुवा दिपेन्द्र चौधरीले बताए । त्यस्तै समस्या समाधानप्रति ध्यान नदिए अझै सशक्त रुपमा कडा आन्दोलन गर्न बाध्य हुने अर्का नेता बिनोदकुमार यादवले बताए ।

यदि किसानको जायज माग अविलम्ब कार्यान्वयन गर्ने तर्फ सम्बन्धित निकायले ध्यान नदिएको खण्डमा अझै कडा आन्दोलन गर्ने चेतावनी समेत दिए ।