प्रदेश २ : ११ हजार घुससहित नापतौलका ४ कर्मचारी पक्राउ, दुई जनामा कोरोना संक्रमण

टुडेपाटी-
वीरगञ्ज, मंसिर २० गते ।

गुणस्तर तथा नापतौल कार्यालय वीरगञ्जका ४ जना कर्मचारीलाई जिल्ला प्रशासन कार्यालय पर्साले घुससहित पक्राउ गरेका छन् । उद्योग अनुगमनको क्रममा घुस लिएको आरोपमा कार्यालयमा कार्यरत सहायक निरीक्षक विरेन्द्र उपाध्याय, कार्यालय सहयोगीहरु पदम बहादुर रोक्का, सत्य नारायण चौधरी र सवारी चालक उदय प्रताप सिंहलाई प्रशासनले नियन्त्रणमा लिएको हो ।

एउटा टेक्सटायल उद्योगमा अनुगमनको क्रममा उनीहरुले ११ हजार रुपैयाँ घुस लिएकाले नियन्त्रणमा लिएर आवश्यक कारबाही प्रक्रिया अगाडि बढाइएको पर्साका प्रमुख जिल्ला अधिकारी आस्मान तामाङले जानकारी दिए । ‘उद्योग अनुगमनको क्रममा ११ हजार घुस लिएको पुष्टि भएपछि बिहीबार उनीहरुलाई नियन्त्रणमा लिएका हौं,’ उनले भने, ‘दुई जनामा कोरोना संक्रमण पुष्टि भएको छ, संक्रमणमुक्त भइसकेपछि अख्तियारको जिम्मा लगाउँछौं ।’

गुणस्तर तथा नापतौल कार्यालयका प्रमुख वरिष्ठ निरीक्षक शशीभुषण यादवका अनुसार कार्यालयले सातामा दुई÷तीन दिन नियमित अनुगमन गर्दै आइरहेको छ । साताभरी गरेको अनुगमनको रिपोर्ट हरेक शुक्रबार माथिल्लो निकायमा बुझाउनुपर्ने हुन्छ ।

‘गण्डक चोकका केही उद्योगमा नापतौल कार्यालयबाट अनुमति नलिई तौल गर्ने गरेको भनेर सूचना आएपछि विहीबार उनीहरु अनुगमनका लागि निस्केका थिए,’ उनले भने, ‘तर उनीहरु टेक्सटायल उद्योग अनुगमन गर्न गएछन् । प्रमुख जिल्ला अधिकारीले उनीहरुलाई प्रशासनमा ल्याउन भन्नुभयो । घटनाबारेमा त मलाई पछि मात्रै थाहा भयो ।’

उनीहरुले टेक्सटायल उद्योगको अनुगमनपछि तौल गर्ने मेसिन खराब छ भनेर नियन्त्रण लिएका थिए । पछि बार्गेनिङ गरेर ११ हजार रुपैयाँ घुस लिएर काँटा फिर्ता गरिदिएका थिए ।

घुस लिएको उजुरी प्रमुख जिल्ला अधिकारी तामाङ समक्ष आएपछि उनीहरुलाई जिल्ला प्रशासन बोलाइएको थियो । कर्मचारीहरुले ११ हजार घुस लिएको र गाडीमै बाँडफाँट गरेको स्वीकार गरेको जिल्ला प्रशासन कार्यालय पर्साले जनाएको छ ।