रक्सौल विधानसभाबाट सुनतस्कर अशोकका दाइ प्रमोद सिन्हा बीजेपीबाट विजयी

टुडेपाटी-
वीरगञ्ज, कात्तिक २५ गते ।

भारतको विहार राज्यमा सम्पन्न विधानसभा निर्वाचनमा रक्सौलका प्रमोद सिन्हा विजयी भएका छन् । सीमावर्ती शहर रक्सौलबाट उम्मेदवारी दिएका सिन्हाले कांग्रेसका उम्मेदवार सुरेश यादवलाई पराजित गरेका छन् ।

विधानसभा चुनावमा सिन्हाले ४४ हजार ४३ मत प्राप्त गरी विजयी भए । प्रतिद्वन्द्वी यादवले १८ हजार २०३ मत मात्रै प्राप्त गरे ।

विजयी सिन्हाका भाई अशोक सिन्हाको गत कात्तिक १ गते वीरगन्जको रेश्मकोटीस्थित श्री गणेश एपार्टमेन्टबाट अवैध रुपमा २३ केजी २३७ ग्रामको सुन र झन्डै दुई किलो २६२ ग्राम चाँदी बरामद भएको थियो ।

अशोक अझै फरार छन् । प्रमोदको चुनाव खर्च जुटाउन उनका भाइ अशोकले सुन तस्करी गर्न खोजेको शंका गरिएपनि त्यसको पुष्टि हुन सकेको छैन ।

झन्डै १९ करोड मूल्य बराबरको सुन राजस्व कार्यालयमा बुझाइसकिएको छ ।