रौतहटमा २४ दिनको लागि निषेधाज्ञा

टुडेपाटी-

रौतहट, कार्तिक २१ गते ।

जिल्ला प्रशासन कार्यालय रौतहटले २४ दिनको लागि निषेधाज्ञा जारी गरेको छ । चाड पर्वमा हुनसक्ने भिडभाडलाई लक्षित गर्दै प्रशसनले शुक्रबार एक सूचना जारी गर्दै जिल्लामा कात्तिक २१ गते मध्यरात १२ बजेदेखि अगामी मंसिर १७ गते मध्यराति सम्म २५ दिनको लागि निषेधाज्ञा जारी गरेको हो ।

तर निषेधाज्ञामा बजार, कार्यालय तथा सावरी साधन बन्द नहुने प्रमुख जिल्ला अधिकारी इन्द्रदेव यादवले स्पष्ट पारे । ‘बजार र यातायात बन्द हुनु मात्र निषेधाज्ञा होइन् । यो फरक तरिकाको निषेधाज्ञा हो । जुन यसअघि दशैँको बेला पनि जारी गरिएको थियो,’ टुडेपाटीसँग उनले भने ।

जिल्लामा हालसम्म १४ जनाको कोरोना संक्रमणबाट मृत्यु भइसकेको र १७४ जना अहिले पनि सक्रिय कोरोना संक्रमितहरु रहेकोले समुदाय स्तरमा कोरोना नफैलोस भन्ने उद्देश्यका साथ जिल्ला प्रशासन कार्यालय रौतहटले निषेधाज्ञा जारी गरेको रौतहटका प्रमुख जिल्ला अधिकारी यादवले जानकारी दिए ।

तिहार, छठ तथा वाग्मती नदीको पूर्णिमा स्नान गर्ने लगायतका चाडपर्व नजिकिएकाले प्रशासनले भिडभाड नहोस् र कोरोना संक्रमण नफैलोस् भनी शुक्रवार रातिदेखि निषेधाज्ञा जारी गरेको बताएको छ । 

सार्वजनिक स्थलमा खेल तमासा, नाचगान, जात्रा, महोत्स, भोजभतेर, हाटबजार, विभिन्न धार्मिकस्थलमा पूजापाठ तथा धार्मिक गतिविधि, चार्डपर्वको अवसरमा गरिने साँस्कृतिक तथा सामाजिक कार्यहरु, सिनेमाघर, सैलुन, होटल, रेस्टुरेन्ट पार्टीप्यालेसलगायतको कार्य गर्न गराउन निषेध गरिएको प्रशासनले जारी गरेको विज्ञप्तिमा उल्लेख छ ।