गरुडा प्रहरी हिरासतमा फेरि एक महिलाको मृत्यु

टुडेपाटी-
रौतहट, असोज १५ गते ।

इलाका प्रहरी कार्यालय गरुडाको हिरासतमा फेरि एकजना महिलाको मृत्यु भएको छ । अनैतिक सम्बन्धको आरोपमा पक्राउ परी हिरासतमा रहेकी ती महिला बिहिबार बिहान मृत अवस्थामा फेला परेकी हुन् ।

रौतहटको गुजरा नगरपालिका २ कटानी बजारकी राधिका राउतको गरुडास्थित प्रहरीको महिला सेल हिरासतमा मृत्यु भएको हो । महिला सेलका सुरक्षाकर्मीले बिहान राउतलाई मृत अवस्थामा फेला परेको देखिएपछि प्रहरीलाई खबर गरेकी थिइन् ।

कटानी बजारका एक युवक सँग अनैतिक सम्बन्ध राखेका बेला उनका श्रीमान सुमन राउतले बुधबार साँझ फेला पारी वडाअध्यक्षको रोहवरमा राधिकालाई प्रहरीको जिम्मा लगाएका थिए । प्रहरीले दुबैलाई निन्यत्रणमा लिएर स्वास्थ्य जाँच गराएको थियो । राधिकाले आफु छारे रोगी भएको र लामो समय देखी औषधि सेवन गरिरहेको प्रहरीलाई बताएकी थिइन् ।

हिरासतमा रहेकी बेला राती उनलाई दुई पटक छारे रोगले च्यापेको थियो । राधिकाका श्रीमानले पनि लामो समय देखी छारे रोगको उपचार गराईरहेको प्रहरी समक्ष बताएका छन् । हिरासतमा रहेकी महिलाको मृत्युको विषयमा अनुसन्धान भइरहेको जिल्ला प्रहरी कार्यालय रौतहटका डिएसपी भरत श्रेष्ठले जानकारी दिए ।

यस भन्दा अघि कर्तव्य ज्यान मुद्दामा पक्राउ परेका दलित युवक विजय रामको पनि गरुडाको हिरासतमै मृत्यु भएको थियो । प्रहरीले कुटपिट गरि दलित युवकको हत्या गरेको चौतर्फी आन्दोलन समेत भएको थियो ।