प्रदेश २ मा कोरोनाबाट २ जनाको मृत्यु, एकैदिन झण्डै ६ सय जना निको

टुडेपाटी-
जनकपुरधाम, असोज १४ गते ।

पछिल्लो २४ घण्टामा प्रदेश २ मा कोरोना संक्रमणबाट दुईजनाको मृत्यु भएको छ । सप्तरीको अग्निसाई कृष्णासवरन नगरपालिका ४ का ३९ वर्षीय सर्लाहीको वरहथवा नगरपालिका ६ का ६६ वर्षीय पुरुषको कोरोनाबाट मृत्यु भएको हो ।

दुबैजनाको बुधबार मृत्यु भएको समाजिक विकास मन्त्रालयकाका बरिष्ट चिकित्सक डा.कमलेश यादवले जानकारी दिए । योसंगै यस प्रदेशबाट कोरोनाबाट हालसम्म मृत्यु हुनेको संख्या १३३ पुगेको छ ।

यस्तै पछिल्लो २४ घण्टामा यस प्रदेशमा उपचार पश्चात ५ सय ९७ जना संक्रमित कोरोना मुक्त भएका छन् । निको हुनेमा ५ सय ९ जना पुरुष र ८८ जना महिला छन् । यो संगै कोरोना मुक्त हुनेको संख्या १० हजार ५ सय ४२ पुगेको छ ।

प्रदेश २ मा बुधबार ४९ जना कोरोना संक्रमित थपिएको मन्त्रालयले जनाएको छ । यससंगै प्रदेश २ मा कोरोना संक्रमितको संख्या १३ हजार ५ सय २७ पुगेको हो ।