रेल्वेले १२९ जना कर्मचारी मागेकोमा ३२ हजारले दिए आवेदन, नेपालभित्रै छिटै रेल संचाल गर्ने तयारी

टुडेपाटी

जनकपुरधाम, असोज १४ गते ।

जनकपुर–जयनगर रेल सञ्चालनका लागि नेपाल रेल्वे कम्पनी लिमिटेडले विभिन्न २९ पदमा कर्मचारी माग गरेकोमा करिब ३२ हजारले आवेदन दिएका छन् । अन्तिम म्याद १२ असोजसम्म करिब ३२ हजारले आवेदन दिएको कम्पनीका महाप्रबन्धक गुरुप्रसाद भट्टराईले जानकारी दिए ।

उनले भने, ‘कुन पदमा कति जनाले आवेदन दिएका छन् भन्ने छुट्याउने काम भइरहेको छ । २९ पदमा एक सय २९ जना माग भएकोमा करिब ३२ हजारको हाराहारीमा आवेदन परेको छ ।’

स्टेसन मास्टर, लेखा, प्रशासन, सुरक्षागार्डलगायतका २९ वटा पदमा एक सय २९ जना कर्मचारी माग गरिएको कम्पनीले बताएको छ । ३२ हजारमध्ये पहिलो चरणमा शैक्षिक योग्यता, अनुभवलगायतका आधारमा उपयुक्त उम्मेदवारको सूची सार्वजनिक गरिने भट्टराईले बताए ।

मौखिक परीक्षापश्चात् उत्कृष्ट आवश्यक एक सय २९ जनालाई तत्काल नै नियुक्ति दिने उनले बताए । रेल आइसकेको अवस्थामा कुनै पनि हालतमा रेल सञ्चालन हुने उल्लेख गर्दै उनले भने, ‘रेल चल्दैन भनेर नसोच्नुस्, रेल कुनै पनि हालतमा सञ्चालन हुने नै हो, रेल प्रधानमन्त्रीज्यू र आमनेपालीको सपना हो, त्यसकारण रेल सञ्चालन निकट भविष्यमै हुन्छ ।’

महाप्रबन्धक भट्टराईका अनुसार कोरोना महामारीबीच नेपाल र भारतको क्रस बोर्डर भएर चल्ने जनकपुर– जयनगर रेल सञ्चालनमा ढिलाइ भए पनि रेल चाँडै नै चल्ने छ । उनले भने, ‘नेपालभन्दा छिमेकी देश भारतमा कोरोनाको कहर बढी छ, त्यसकारण नेपाल–भारत रेल चलाउन नसकिए पनि नेपालभित्रै भए पनि रेल चलाउँछौँ ।’