सिरहामा १५ लाखभन्दा बढीको अवैध सुनसहित २ जना पक्राउ

नितेश यादव-
जनकपुरधाम, फागुन १३ गते ।
सिरहामा १५ लाखभन्दा बढीको अवैध सुनसहित २ जना पक्राउ परेका छन् । पक्राउ पर्नेमा सिरहाको लहान नगरपालिका-१९ छर्रापट्टी बस्ने २४ वर्षीय मोहम्मद मोतिउल रहमान र सोही ठाउँका २१ वर्षीय मोहम्मद मुर्तुजा छन् ।

मंगलबार विहान ८ बजे सिरहाको लहान नगरपालिका-१९ छर्रापट्टी स्थित गोप्य सूचनाको आधारमा इलाका प्रहरी कार्यालय लहान सिरहाबाट खटेको सादा पोसाकको प्रहरी गस्ती टोलीले उनीहरुलाई पक्राउ गरेको जिल्ला प्रहरी कार्यालय सिरहाका प्रहरी नायव उपरीक्षक विनोद घिमिरेले जानकारी दिए ।

डिएसपी घिमिरेका अनुसार को.३८प. २६३२ नम्बरको मोटरसाइकललाई चेकजाँच गर्दा उनीहरुको साथबाट सुनको ४ वटा चेप्टो टुक्रा गोलो बनाई लुकाईछिपाई राखेको सुन २३३ ग्राम अन्दाजी रु.१५ लाख ५८ हजार ७९ रुपैयाँ बराबरको सुन र मोटरसाइकल सहित पक्राउ गरेको छ ।

पक्राउ परेका दुबैलाई इलाका प्रहरी कार्यालय लहानमा ल्याई जिल्ला भन्सार कार्यालय ठाडी सिरहामा बुझाईएको डिएसपी घिमिरेले बताए ।

त्यसैगरी, सिरहा प्रहरीले लागुऔषध सहित एकजनालाई पक्राउ गरेको छ । धनुषाको गणेशमान चारनाथ नगरपालिका-५ टडियाका ३४ वर्षीय तिर्थबहादुर कार्कीलाई पक्राउ गरेको हो ।

पक्राउ परेका कार्कीलाई सिरहाको कर्जन्हा नगरपालिका-३ जनक चोकबाट मोटरसाइकल र शरीरमा लुकाई छिपाई ल्याएको डाइलेक्स डिसी १०० एम.एल. को ५ बोतल, नाईट्रोभेट ट्याब्लेट २२ पिस, स्पास्मो ट्याब्लेट १५ पीससहित नियन्त्रणमा लिएको सिरहाका प्रहरी नायव उपरीक्षक घिमिरेले जनाकारी दिए ।