नेपालमा बिहीबार अहिलेसम्मकै धेरै कोरोना संक्रमित, मृतकको संख्या १८६ पुग्यो

टुडेपाटी-
जनकपुरधाम, भदौ ११ गते ।

नेपालमा पछिल्लो २४ घण्टाको अवधिमा अहिलेसम्मकै धेरै कोरोना संक्रमित थपिएका छन् । देशभर बिहीबार थप १ हजार १११ जनामा कोरोना भाइरस संक्रमण पुष्टि भएको हो ।

योसँगै कुल संक्रमितको संख्या ३५ हजार नाघेको छ । स्वास्थ्य तथा जनसंख्या मन्त्रालयको कोभिड- १९ सम्बन्धी नियमित पत्रकार सम्मेलनमा प्रवक्ता प्रा.डा. जागेश्वर गौतमले देशभरका विभिन्न प्रयोगशालामा गरिएको परीक्षणमा ३३४ महिला र ७७७ पुरुष गरी १ हजार १११ जनामा कोरोना भाइरस संक्रमण देखिएको जानकारी दिए ।

आजसम्म ३५ हजार ५२९ जनामा संक्रमण पुष्टि भएको छ । यीमध्ये १५ हजार २७३ जना सक्रिय संक्रमित छन् ।

त्यस्तै, पछिल्लो २४ घण्टाको अवधिमा ५६९ जना संक्रमित निको भएर घर फर्किएका छन् । अहिलेसम्म निको हुनेको संख्या २० हजार ७३ पुगेको मन्त्रालयको तथ्यांक छ ।

पछिल्लो २४ घण्टाको अवधिमा १२ हजार ६२९ जनाको पीसीआर विधिबाट कोरोना परीक्षण गरिएको छ । त्यस्तै बिहीबार थप ८ जना संक्रमितको मृत्यु भएको छ । योसँगै मृतकको संख्या १८६ पुगेको छ ।