विद्यार्थीले स्वास्थ्यको प्राविधिक विषय पढ्न नपाउने, अनमी, सीएमए लगायत कार्यक्रम बन्द

टुडेपाटी

काठमाडौँ, भदौ १० गते ।

सीटीईभीटीको प्रमाणपत्र तहमुनिका अनमी, सीएमए, ल्याब असिस्टेन्ट, आयुर्वेद, अकुपञ्जर र अकुप्रेसरका कार्यक्रम बन्द गर्ने निर्णय भएको छ ।

राष्ट्रिय चिकित्सा शिक्षा आयोगले यस वर्षदेखि प्राविधिक शिक्षा तथा व्यावसायिक तालिम परिषद् (सीटीईभीटी) अन्तर्गतको चिकित्सा शिक्षातर्फको प्रमाणपत्र तहभन्दा मुनिका कार्यक्रममा भर्ना नलिने निर्णय गरेको छ ।

आयोगले विश्वविद्यालय र प्रतिष्ठान अनि सोअन्तर्गतका शिक्षण संस्थाहरूले सञ्चालन गरेको प्रमाणपत्र तहका कार्यक्रममा पनि भर्ना लिन नपाइने निर्णय गरेको आयोगका सदस्य सचिव डिल्लीराम सचिव लुइटेलले जानकारी दिए । उनका अनुसार यसै वर्षदेखि भर्ना नलिने निर्णय भएको हो ।
तर यसअघि भर्ना भएका विद्यार्थीले कोर्स पूरा गर्न पाउनेछन् । ‘यसअघि भर्ना भएकाको कार्यक्रम रोकिँदैन । कोर्स पूरा हुन्छ । नयाँ भर्ना मात्र नहुने हो’, उनले भने, ‘अहिले पढिरहेका विद्यार्थी उनुत्तीर्ण भएमा ३ पटकसम्म मौका परीक्षा दिन पाउनेछन् ।’

भर्ना बन्द भएका सीटीइभीटीको कार्यक्रम एसएलसी सरहको हो । बजारमा जागिरका लागि समस्या, र स्वास्थ्य मन्त्रालयले अनमी, अहेब, ल्याब असिस्टेन्ट जस्ता कार्यक्रममा जागरिका लागि विज्ञापन नखुलाउने भएकाले पनि बन्द गरिएको सरकारी अधिकारी बताउँछन् ।