कालिकोटमा पहिरोले पुर्दा एकै परिवारका ६ जनाको मृत्यु

टुडेपाटी-

सुर्खेत, साउन ३० गते ।

कालिकोटमा पहिरोले घर पुर्दा एकै परिवारका ६ जनाको मृत्यु भएको छ ।

निरन्तरको वर्षाका कारण कालिकोटको महावै गाउँपालिका-३ नकुमा पहिरोले घर पुर्दा ६ जनाको मृत्यु भएको प्रहरीले जनाएको छ ।

घटनास्थलमा रहेका कर्णाली प्रदेशका मुख्यमन्त्री महेन्द्रबहादुर शाहीका स्वकीय सचिव खेमबहादुर सिंहका अनुसार बिहीबार राति साढे १२ बजे वडा सदस्य रजबहादुर बिष्टको घर पहिरोले पुरेको हो ।

सिंहका अनुसार पहिरोमा परेर रजबहादुरका छोरा १३ वर्षीय पुष्प विष्ट, ११ वर्षीय प्रविण विष्ट, १८ वर्षीय सविना विष्ट र १५ वर्षीय आशा विष्टको मृत्यु भएको छ ।

सोही घरमा सुतिरहेका रजबहादुरका दाजु डिलबहादुरका १९ वर्षीया छोरी शान्ति विष्ट र १० वर्षीया छोरी रेशा विष्टको पनि मृत्यु भएको छ ।

यस्तै कालिकोटकै नरहरिनाथ गाउँपालिकामा पहिरोले घर पुर्दा दुई जना घाइते भएका छन् ।