सप्तरीमा टिपरको ठक्करबाट दुईजनाको ज्यान गयो, ६ जना घाइते

शुभनारायण यादव-
सप्तरी ,फागुन ६ गते ।

सप्तरीमा टिपरले अटो रिक्सालाई ठक्कर दिँदा दुईजना भारतीय नागरिकको ज्यान गएको छ भने ६ जना घाईते भएका छन् । इस्तिमा सकाएर घर तर्फ फर्किदै गरेको अवस्थामा बोदेबर्साईन नगरपालिकाबाट विष्णपुर तर्फ जादै गरेको ना.१.क.५५२७ नंम्बरको टिपरले बिपरित दिशाबाट आउदै गरेको स.१.ह.३७९५ नम्बरको अटोलाई बोदेबर्साईन नगरपालिका ४ गौरा स्थित ठक्कर दिँदा उक्त दुर्घटना भएको हो ।

ज्यान जानेहरुमा अटोमा सवार भारतको अररिया जिल्ला मोतिहारी ग्राम पंचायत ७ बस्ने अन्दाजी २६ बर्षिय मोहम्द सदाम हुसेन र अटोमा सवार सोही ठाउँका ४५ बर्षिया कुन कुनिया खातुन रहेको जिल्ला प्रहरी कार्यालय सप्तरीले जनाएको छ ।

प्रहरीका अनुसार दुर्घटनामा हुसेनको घटनास्थलमै मृत्यु भएको छ भने अटोमा सवार खातुनको न्युरो अस्पताल बिराटनगर उपचार गर्न ल्यैजाने क्रममा बिच बाटोमा नै मृत्यु भएको हो । त्यस्तै सो दखुर्घटनामा सप्तरीको महदेवा गाउँपालिका वडा न. १ बस्ने ४० बर्षिय मोहम्द सलिउदिन ,उनका श्रीमति ३५ बर्षिया मुनिया खातुन ,उनका छोरा १२ बर्षिय मोहम्द अकबर ,१० बर्षिय मोहम्द दाबेल, ६ बर्षिय मोहम्द आशिक र मोहम्द सलाउदिनको छोरा ९ बर्षिय मोहम्द अनवर गम्भिर घाईते भएको प्रहरीले जनाएको छ ।

यता घाईतेहरुको टाउको ,छाति ,खुटा र हातमा चोट लागेको तथा उनीहरुको स्थानिय जिवनदिप अस्पताल बोदेबर्साईनमा उपचार भईरहेको प्रहरीले जनाएको छ ।
यसैबिच ठक्कर दिने टिपर र अटोलाई ईलाका प्रहरी कार्यालय बोदेबसाईनले नियन्त्रणमा लिई घटनाको आवश्यक अनुसन्धान कार्य भईरहेको सप्तरी प्रहरीले जनाएको छ ।