वीरगञ्जमा मृतक महिलामा कोरोना पुष्टि, डाक्टर सहित २२ जना संक्रमित थपिए

टुडेपाटी-

वीरगन्ज, साउन २६ गते ।

वीरगन्जमा एकजना महिलाको मृत्युपछि कोरोना पुष्टि भएको छ । ४५ वर्षीया महिलाको आइतबार गण्डक अस्पतालमा उपचारकै क्रममा मृत्यु भएको हो ।

वीरगंज महानगरपालिका–१५ भेडियाहीकी ४५ वर्षीय महिलाको मृत्युपछि रिपोर्ट पोजेटिभ आएको हो । उच्च रक्तचाप र हाइपोथाइराइडकी विरामीको अचानक स्वास्थ्यमा गडबडी भएपछि उनको आइतवार बिहान गण्डक कोभिड अस्पतालमा उपचारको क्रममा मृत्यु भएको थियो । उनमा श्वासप्रश्वासमा अचानक समस्या देखिएको गण्डक कोभिड अस्पतालका संयोजक डाक्टर उदयनारायण सिंहले बताए ।

त्यस्तै वीरगंजमा एक जना डाक्टर, केही स्वास्थ्यकर्मीसहित २२ जनामा कोरोना संक्रमण पुष्टि भएको छ ।

नारायणी अस्पताल कोभिड प्रयोगशालाको आइतवार राति आएको नतिजा अनुसार ६ महिला सहित २२ जनामा कोरोना संक्रमण पुष्टि भएको नारायणी अस्पतालका मेडिकल सुपरिटेन्डेन्ट डाक्टर मदनकुमार उपाध्यायले जानकारी दिए ।

पर्सामा अब १ हजार ४० जनामा कोरोना संक्रमण पुष्टि भएको छ भने हाल सम्म वीरगंजको विभिन्न अस्पतालमा उपचारको क्रममा २२ जनाको मृत्यु भएको छ । मृत्यु हुनेमा दुई जना भारतीय, एक जना वेवारिसेसमेत छन् । गएको २५ दिनमा यहाँ १८ जनाको मृत्यु भएको छ ।

त्यसैगरी, पोखरीया नगरपालिकाका २५ वर्षीय डाक्टर पनि कोरोना संक्रमणको सिकार भएका छन् । २२ र २३ वर्षका स्वास्थ्यकर्मी पनि संक्रमित भएका छन्। बारा घर भइ नारायणी अस्पतालमा मेडिकल वार्डमा कार्यरत २० वर्षीय महिला स्वास्थ्यकर्मी पनि संक्रमित भएकी छन् । पोखरीया नगरपालिका वडा नं १ का वडा अध्यक्ष बंका राउत कुर्मी पनि संक्रमित भएका छन् ।

जिल्ला प्रहरी कार्यालय पर्साबाट संकलन गरिएको २२, २६, २९, ३५ वर्षिय गरी चार जनामा कोरोना संक्रमण पुष्टि भएको नारायणी अस्पतालले जनाएको छ । त्यसैगरी, बारा, जितपुर सिमरा उपमहानगरपालिका वडा नं २३ रामपुरटोकनीमा रहेको म्यागनस फर्माका ३६ र ४० वर्षका पुरुष र ४८ वर्षकी महिला गरी ती जना मजदुरमा कोरोना संक्रमण पुष्टि भएको छ । वीरगंजको छपकैया, विर्ता, श्रीपुर, आदर्श नगर, नगवा लगायतका ठाउँका ११ जनामा संक्रमण देखिएको छ ।