मेयरको गुण्डागर्दी : छोराले भिडियो खिचेको निहुमा बुबालाई कुटपिट गर्दै शौचालयमा थुने
शैलेन्द्र क्रान्ति-
जनकपुरधाम, फागुन ६ गते ।
लामो संघर्ष र बलिदान पश्चात प्राप्त भएको संघीय लोकतान्त्रिक गणतन्त्रमा गाउँ गाउँमा सिंह दरबार पुग्दा सहजै सेवा, विकास निर्माणको काम र आफैले चुनेको जनप्रतिनिधिबाट सहयोग पाउने भन्दै नागरिक खुसी थिए । तर आफैले भोट हालेर छानेर पठाएको जनप्रतिनिधिहरु पदको उन्मादमा साशक र तानासाही बन्दा नागरिक उल्टै प्रताडित हुन थालेका छन् । राज्यको सेवा सुविधामा रमाइरहेका जनप्रतिनिधिबाटै बेला–बेला विभिन्न बहानामा भइरहेको कुटपिट र अराजक क्रियाकलापले संघीयता जनतालाई घाडो जस्तै बन्दै गएको छ । यसको एउटा ताजा उदाहरण हो बाराको महागढीमाई नगरपालिकाको घटना ।
अधुरो विकास निर्माणको कामको विषयमा छोराले गुनासो गरेको र भिडियो खिचेको भन्दै महागढीमाई नगरपालिकाका मेयर उपेन्द्र यादवले एक सर्वसाधारणलाई गालीफजिती तथा कुटपिट गर्दै आधा घण्टा शौचालयमा थुनेका छन् । महागढीमाई नगरपालिका २ बरियारपुरका ५५ वर्षीय महेन्द्र भन्ने हरेन्द्र महतोलाई मेयर यादवले सोमबार तथानाम गाली तथा कुटपीट गर्दै आधा घण्टा नगरपालिकाको शौचालयमा थुनेका हुन् । सोमबार दिउँसो खेतमा पानी सिंचाइ गरिरहेका महतोलाई नगरप्रहरी लगाएर समातेर ल्याई कुटपिट तथा शौचालयमा थुनेको पीडितले बताएका छन् ।
‘दिउँसो खेतमा पानी सिँचाइ गरिहहेको थिएँ । केहि नगरप्रहरी खेतमा पुगे । मलाई मेयरसाहेबले बोलाउनु भएछ भन्यो । म गएँ । सडकमा जाँदा १५।१६ जनाको समुहमा नगरप्रहरी तथा केटाहरु थिए । मलाई डर लाग्यो । छोरा कहाँ छ भनेर सोध्यो । मैले भने थाहा छैन । त्यसपछि मोटरसाइकलमा बस्न भन्यो । डरले मोटरसाइकलमा बसे । मलाई नगरपालिकामा लग्यो ।’ हरेन्द्रले सुनाए ।
Sponsored
नगरपालिकामा लगेपछि मेयर यादवले मलाई छोरा कहाँ छ भनेर सोध्दै तथानाम गालीगलौज गर्दै गालामा एक झापड हिर्काएको बुबा हरेन्द्रले आफ्नो पीडा सुनाए ।
‘सुरुमा मेयरले तिम्रो छोरा कहाँ छन् सोधे , मैले भने मलाई भनेर गएको छैन । गालीगलौज गर्न थाले । त्यसपछि मेयरले लगाएको जुता फुकालेर मलाई आफ्नो टाउकोमा राख्न भन्यो । मैले नराखेपछि पनि उनले आफै जुत्ता फुकाले । फेरी राख्न भन्यो । मैले इन्कार गरे । त्यसपछि मलाई एक झापड गालामा हिर्काए र नगरपालिकाको चर्पीमा लगेर थुन दियो’ बुबा हरेन्द्रले भने ‘आधा घण्टापछि मलाई निकाले । त्यसपछि मेयरले फेरी गाली गर्दै आफ्नो घर लगे । डेढ घण्टा जति आफ्नो नियन्त्रणमा राखे । छोरालाई बोलाउन भन्दै थिए । केहि नगरप्रहरीले पनि मर्लाइ तथानामा गाली फजिती गरे । भोली छोरालाई उपस्थित गराउनु भन्दै साँझ ५ बजे छाडे ।’ बुबा हरेन्द्रले विना कसुर आफुमाथि दुब्र्यबहार गर्ने मेयरलाई कारबाही हुनुपर्ने माग गरे ।
घटनाको कारण :
गत आर्थिक वर्ष २०७५।०७६ मा सम्पन्न हुनुपर्ने नालाको काम अहिलेसम्म अधुरै रहेको छ । नालामा पानी जम्ने गरेको कारण स्थानीयलाई समस्या हुने गरेको भन्दै स्थानीय हरेन्द्रका छोरा मुकेश कुशवाहाले ६ महिनादेखि पटक पटक नगरप्रमुख यादवलाई गुनासो गर्दै आएका थिए । मुकेशका अनुसार नगरपालिकाकै सव इन्जिनियर श्याम जयसवालले आफ्नै नेतृत्वमा उपभोक्ता समिति गठन गरी ४० लाखमा नाला बनाउने जिम्मा लिएका छन् । ४० लाख बजेट निकासा गरेपनि नाला अधुरै छाडेपछि पानी जम्ने र अmुहरुले समस्या पाउने गरेको मेयर यादवलाई मुकेशले पटक पटक गुनासो गरेपछि आजित भएर सोमबार बिहान उनी नाला निरीक्षण गर्न पुगेका थिए । मेयरले निरीक्षण गरिसकेपछि अहिले यो समस्या समाधान गर्न नसक्ने, तिनीहरुलाई जहाँ जानु छ जाउ’ भन्ने प्रतिक्रिया दिएको र उहाँको त्यो प्रतिक्रियाको भनेरै खिच्न खोज्दा आफुलाई धम्काउँदै मोबाइल समेत खोस्ने प्रयास गरेको मुकेशको भनाइ छ ।
Sponsored
‘घटनापछि मेयर साहेब विभिन्न धाकधम्की दिँदै यहाँबाट जानु भयो । म पनि अर्कै कामले घरबाट बाहिर थिएँ । दिउँसो केहि नगरप्रहरी मेरो घरमा मलाई खोज्न आए । म नभएपछि मेरो बुबालाई खेतबाट समातेर लगि कुटपिट र शौचालयमा थुने ’, मुकेशले भने ‘ बुबालाई गुण्डागर्दी शैलीमा मेयरले गरेको दुब्र्यबहार तथा कुटपिटले म पनि असुरक्षित महसुस गरी बाहिर छु । अब विकासे कामको लापरबाही विषयमा गुनासो पनि गर्न नपाउने ? कुन तन्त्र हो यो ? विनासिती मेरो बुबालाई दुब्र्यहार गर्ने मेयर यादवमाथि कडा कारबाही हुनुपर्छ । म न्यायको लागि प्रशासन जान्छु ’
उनले ५ सेकेण्डको त्यो भिडियो एकजना भाइले समाजिक सञ्जालमा हालेको समेत बताए ।
मुकेशलाई यतिकै छाड्दिन : मेयर
यता मेयर यादवले मुकेशको बुबालाई बोलाएर सोधपुछ मात्रै गरेको बताए । उनले मुकेशलाई यतिकै नछाड्ने समेत चेतावी दिए । ‘मुकेशले मेरो भिडियो बनाएर फेसबुकमा हालेछन् । उ फेला नपरेपछि उसको बुबालाई सोधपुछको लागि मात्र बोलाएको थिएँ । कुटपिट र शौचालयमा थुनेको छैन । तर मुकेशलाई यतिकै छाड्दिन । जहाँबाट भए पनि समातेर ल्याई कानुनी कारबाही गर्छु ।’ मेयर यादवले चेतावनी दिँदै भने । मेयर यादव नेपाली काँग्रेसबाट निर्वाचित छन् ।
