शनिबार रातिदेखि फेरि भारी वर्षाको सम्भावना, आज र भोलीको मौसम कस्तो रहने ?

टुडेपाटी-

जनकपुरधाम, साउन २२ गते ।

मौसमविदले नेपालमा शनिवार रातिदेखि भारी वर्षाको सम्भावना रहेको बताएका छन् ।

शनिबार रातिदेखि मनसुनको न्यून चापीय रेखा फेरि नेपालतर्फ नजिकिने सम्भावना रहेकाले वर्षा बढ्ने मौसम पूर्वानुमान महाशाखाका मौसमविद् समीर श्रेष्ठले जानकारी दिए ।

उनका अनुसार आज र भोलि समेत देशका विभिन्न स्थानमा हल्कादेखि मध्यसम्म वर्षा हुने सम्भावना छ ।

मौसम पूर्वानुमान महाशाखाले बिहीबार बिहान ६ बजे प्रकाशन गरेको मौसम पूर्वानुमान बुलेटिनअनुसार आज दिउँसो देशभर मौसम सामान्य बदली रही गण्डकी प्रदेश, प्रदेश ५, कर्णाली प्रदेश र सुदूरपश्चिम प्रदेशका केही स्थान तथा प्रदेश १, प्रदेश २ र बागमती प्रदेशका थोरै स्थानमा मेघगर्जन र चट्याङसहित हल्कादेखि मध्यम वर्षाको सम्भावना छ।

प्रदेश १ र गण्डकी प्रदेश का एक वा दुई स्थानमा भने भारी वर्षाको समेत सम्भावना छ।

यस्तै राति पनि देशभर सामान्यदेखि पूर्ण बदली रही धेरै स्थानमा मेघगर्जन र चट्याङसहित हल्कादेखि मध्यम वर्षाको सम्भावना छ। प्रदेश १, बागमती, गण्डकी र प्रदेश ५ का एक वा दुई स्थानमा भारी वर्षाको समेत सम्भावना रहेको बुलेटिनमा उल्लेख छ।

यस्तै शुक्रबार दिउँसो देशभर सामान्य बदली रही थोरै स्थानमा मेघगर्जन रचट्याङसहित हल्कादेखि मध्यमसम्म वर्षाको सम्भावना छ। प्रदेश २ र सुदूरपश्चिम प्रदेशका एक वा दुई स्थानमा भारी वर्षाको समेत सम्भावना छ।

यस्तै त्यस राति पनि देशभर सामान्य बदली रही केही स्थानमा मेघगर्जनरचट्याङसहित हल्कादेखि मध्यम वर्षाको सम्भावना छ।