कमलामा जलस्तर बढ्दै, सतर्कता अपनाउन आग्रह

टुडेपाटी–
जनकपुरधाम, साउन २३ गते ।

वर्षासँगै कमला नदीमा पानीको सतह बढिरहेको छ ।

नदीमा पानी बढिरहेकाले स्थानीयवासीलाई सतर्क रहन स्थानीय प्रशासनले आग्रह गरेको छ ।

हालसम्म नदीको बहाव सामान्य रहे पनि सिन्धुलीतिर अझै वर्षा भइरहेकाले जलस्तर अझ बढ्न सक्ने भन्दै स्थानीय प्रशासनले आसपासको क्षेत्रका बासिन्दालाई सतर्क रहन आग्रह गरेको हो ।

धनुषाका प्रमुख जिल्ला अधिकारी काशीराज दाहालले नदी आसपासका बासिन्दालाई सचेत रहन आग्रह गरेका छन् ।

गणेशमान चारनाथ नगरपालिका–८, पोर्ताहामा पुरानो बस्तीमा भएको एउटा फुसको घरमा सामान्य क्षति भएको प्रजिअ दाहालले जनाए ।

उनका अनुसार पानीले घरको भित्ता भत्किँदा घरधनी कमल पासमान सामान्य घाइते भएका छन् ।

जिल्लामा अहिले डुबानको अवस्था नरहे पनि कमला लगायतका नदीमा दिउँसोसम्म जलस्तर बढ्न सक्ने भएकाले सचेत रहन उनले आग्रह गरेका छन् ।