सिरहामा भाडाको भैँसी बाँड्ने सहकाकरीमाथि कारबाही
टुडेपाटी-
जनकपुरधाम, साउन ८ गते ।
सिरहाको औरहीमा भाडाको भैँसी बाँडेको नाटक गरेर गाउँपालिकासग रकम भुक्तानी गराउन खोज्ने सहकारीमाथि कारबाही भएको छ । औरही गाउँपालिका वडा नं. ४ स्थित रहेको खजनपुर सहकारी संस्थालाई कानुन बमोजिम कारबाही गर्ने गाउँपालिकाले निर्णय गरेको हो ।
कार्यपालिकाको बैठकले सहकारीलाई कानुन बमोजिम कारबाही गर्ने निर्णय गरेको गाउँपालिकाका अध्यक्ष शिवजी यादवले बताए । उनका अनुसार सहकारीले भैँसी वितरणमा अनियमितता गरेकाले उक्त सहकारीलाई भुक्तानी नदिने र कालो सूचीमा राख्ने निर्णय गरिएको हो ।
Sponsored
प्रधानमन्त्री कृषि आधुनिकीकरण परियोजना अन्तर्गत गाई÷भैँसी साना व्यावसायिक कृषि उत्पादन केन्द्र (पकेट) विकास कार्यक्रमका लागि उक्त सहकारीलाई गाउँपालिकाले छनोट गरेको थियो ।
उक्त कार्यक्रमका लागि २५ लाख बजेट थियो । जसमा १५ लाख भैँसी वितरण र १० लाख औषधि, च्याप कटर, दूध राख्ने भाँडो, घाँसको बीउ वितरणका लागि छुट्याइएको थियो ।
वितरण गर्ने भैँसी उन्नत जातको १ लाख ५० हजार बराबरको हुनुपर्ने र कूल रकमको ५० प्रतिशत किसानले व्यहोर्ने सम्झौता गाउँपालिका र सहकारीबीच भएको थियो ।
Sponsored
तर कार्यक्रम गर्दा उन्नत जातको २० थान भैँसी वितरण गर्नुपर्नेमा व्यापारीबाट ३ हजारका दरले भाडामा ल्याएको १७ थान लोकल भैँसी मात्र १७ किसानलाई बाँडेर उक्त सहकारीले गाउँपालिकाबाट भुक्तानी लिन खोजेको थियो । भाडाको भैँसी किसानलाई बाँडेको र पुनः फिर्ता लिएको आरोप लागेपछि गाउँपालिकाले छानबिन समिति समेत बनाएको थियो ।
छानबिन समितिले समेत सहकारीले भाडाको लोकल भैँसी किसानलाई वितरण गरेको र किसानबाट पुनः फिर्ता लिई अनुदानको दुरुपयोग गर्न खोजेको ठहर गर्दै कानुन बमोजिम कारबाही र भुक्तानी नगर्न सुझाव दिएको आधारमा कार्यपालिका बैठकले निर्णय लिएको हो ।
