जनमतका नेताकार्यकर्ताले रोपिदिए किसानको एक विघा धान

टुडेपाटी-
जनकपुरधाम, असार २८ गते ।

जनमत पार्टीका मन्त्रीसहित नेताकार्यकर्ताले एक कृषकको एक विघा धान रोपिदिएका छन् ।
महोतरी गाउँपालिका वार्ड-५ का कृष्ण साहको एक विघा धान जनमत पार्टीका नेता कार्यकर्ताको सामूहिक श्रमदानमा रोपिएको हो ।

मजदुर अभावका कारण रोपाइँको हुन नसकेको जानकारी प्राप्त भएपछि नेताकार्यकर्ता पुगेर रोपिदिएको जनमतका केन्द्रीय उपाध्यक्ष समेत रहेका मधेशका विना विभागीय मन्त्री वसन्त कुशवाहाले बताए ।
पूर्व कृषि मन्त्री समेत रहेका कुशवाहा, सांसद अनिता साह, केन्द्रीय कार्यकारिणी सदस्य शम्भुनाथ साह, संजय स्वराजी, एनआरएमए महासचिव डॉ. श्याम महतो लगायतले धान रोपेका हुन् । उनीहरुलाई खेतमा खाजा (जलखई) कृषकले खुवाएका छन् ।

मन्त्री कुशवाहाले मधेशमा सामूहिक खेतीको अवधारणा आजको प्रमुख आवश्यकता रहेको समेत बताए ।
‘खेती किसानीलाई मधेशमा प्रमुख पेशाको रूपमा विकसित गर्नु र एक अर्कालाई सहयोग गरी कृषि पेशालाई मर्यादित बनाउन सबैले जोड़ दिनु पर्छ’ उनले भने ।