महोत्तरीबाट लागूऔषधसहित ३ युवक पक्राउ

टुडेपाटी–
महोत्तरी, चैत २७ गते ।

महोत्तरीमा प्रतिबन्धित लागूऔषधसहित तीनजना पक्राउ परेका छन् ।

पक्राउ पर्नेमा चितवन ९ बस्ने २४ वर्षीय रोहित कार्की, मकवानपुरको बकैया ७ बस्ने २९ वर्षीय संजु खडका र २२ वर्षीय आशिष खड्का रहेको जिल्ला प्रहरी कार्यालय महोत्तरीले जनाएको छ ।

आइतबार दिउँसो सम्सी गाउँपालिका ४ स्थित दशगजा नजिकै प्रहरीको गस्ती टोलीले भारतको कन्हवाबाट नेपालतर्फ पैदल आउँदै गरेका तीनैजनालाई नियन्त्रणमा लिएको प्रवक्ता प्रहरी नायव उपरीक्षक दिलीप कुमार गिरीले जानकारी दिए ।

खुल्ला चौरको बाटो प्रयोग गर्दे आएको उनीहरुलाई शंकाको आधारमा रोकी चेक जाँच गर्दा उनीहरुको साथबाट फेनरागन ५६ पिस, नरकिम ५२ पिस र डाईजोपाम ५७ पिस गरी १६५ पिस लागूऔषध बरामद भएको हो ।

यस सम्बन्धमा थप अनुसन्धान भइरहेको प्रहरीले जनाएको छ ।