राष्ट्रिय क्रिकेट टिमका मुख्य प्रशिक्षकको मासिक तलब झण्डै १६ लाख

टुडेपाटी–
काठमाडौँ, चैत ९ गते ।

नेपाली राष्ट्रिय क्रिकेट टिमका मुख्य प्रशिक्षक मोन्टी देसाईको पारिश्रमिक दुई हजार डलरले बढेको छ ।

नेपाल क्रिकेट संघ (क्यान) ले मुख्य प्रशिक्षक देसाईको पारिश्रमिक वृद्धि गरेपछि अब उनले १२ हजार अमेरिकी डलर पाउने भएका हुन् ।

देसाईले मासिक नेपाली १५ लाख ८४ हजारको हाराहारीमा तलब बुझ्ने छन् ।

क्यानका कार्यवाहक सचिव दुर्गाराज पाठकले सम्झौताअनुसार पारिश्रमिक बढाइएको बताए ।

‘सम्झौतापत्रमै पारिश्रमिक वृद्धि गर्ने भनिएको थियो । उनले नेपाललाई एकदिवसीय अन्तर्राष्ट्रिय मान्यता दिलाउँदै विश्वकप छनोटमा पुर्‍याएमा तलब वृद्धि गर्ने सम्झौता थियो । त्यहीअनुसार तलब बढेको हो’, उनले भने ।

नेपाल टिमको मुख्य प्रशिक्षकमा देसाई आएयता नेपालले खेलेको १२ मध्ये ११ वटा खेलमा जित निकालेको छ भने २०२३ को अन्त्यमा मा हुने विश्वका लागि छनौट चरणका लागि छनौट भएको छ ।