यस वर्षको ‘गोतामे पत्रकारिता स्वर्ण पदक’ मनिका झालाई प्रदान गरिने

टुडेपाटी–
पर्सा, माघ १६ गते ।

यस वर्षको ‘गोतामे पत्रकारिता स्वर्ण पदक’ नेपाल पत्रकार महासंघ धनुषाकी अध्यक्ष मनिका झालाई प्रदान गरिने भएको छ ।

सोमबार वीरगञ्जमा बसेको पत्रकार गोपालचन्द्र गौतम प्रतिष्ठानको बैठकले १३औं ‘गोतामे पत्रकारिता स्वर्ण पदक’ पत्रकार झालाई दिने निर्णय गरेको हो । उनी अन्नपूर्ण पोस्टकी मधेस प्रदेश ब्यूरो प्रमुख हुन् ।

एक कार्यक्रमको आयोजना गरी फागुन २ गते वीरगञ्जमा प्रतिष्ठानले झालाई पुरस्कार प्रदान गर्ने निर्णय भएको प्रतिष्ठानका सदस्य नेपाल पत्रकार महासंघ पर्सा शाखाका अध्यक्ष अनुप तिवारीले जानकारी दिए ।

वीरगञ्जका दिवंगत पत्रकार गोपालचन्द्र गौतमको स्मृतिमा १३ वर्ष अघि स्थापित पत्रकार गोपालचन्द्र गौतम प्रतिष्ठानले हेरक वर्ष यो पुरस्कार प्रदान गर्दै आएको छ ।

सामाजिक उत्तरदायित्व निर्वाह गर्दै अब्बल पत्रकारिता गर्ने एकजना पत्रकारलाई प्रत्येक वर्ष एक तोला सुनको तक्मा पुरस्कार प्रदान गर्ने गरिएको प्रतिष्ठानका अध्यक्ष जगदीश शर्माले बताए ।