महोत्तरीमा बालिका मृत फेला

टुडेपाटी–
महोत्तरी, माघ १५ गते ।

महोत्तरीमा शनिबारदेखि हराईरहेकी एक बालिका पोखरीमा मृत फेला परेकी छिन् ।

जिल्लाको लोहारपट्टी नगरपालिका ५ डठौरा गाउँबाट शनिबारदेखि हराइरहेकी स्थानीय अरुण दासकी छोरी चार वर्षीया अंशुकुमारी आज बिहान १० बजे आफ्नै घर पछाडि रहेको पोखरीमा डुबेर मृत्यु भएको अवस्थामा फेला परेको जिल्ला प्रहरी कार्यालय महोत्तरीका प्रवक्ता प्रहरी नायब उपरीक्षक सन्तोषकुमार पोखरेलले जानकारी दिए ।

शनिबार खेल्दाखेल्दै उनी घरबाट हराएकी थिइन्। उनलाई परिवारजन, इष्टमित्र, आफन्तजन र प्रहरीले शनिबार दिनभरि तथा रातभरि सबैतिर खोजतलाश गरिसक्दा पनि फेला फेला पारेका थिएनन्।

आइतबार उनको शव आफ्नै घर पछाडि रहेको पोखरीमा तैरिरहेको अवस्थामा फेला परेको हो।

शव परीक्षणका लागि जिल्ला अस्पताल लैजाने तयारी भइरहेको तथा यस सम्बन्धमा थप अनुसन्धान भइरहेको जिल्ला प्रहरी कार्यालय महोत्तरीले जनाएको छ ।