धनुषामा दिनदहाडै रकम लुट्ने दुई युवक पक्राउ
टुडेपाटी-
जनकपुरधाम, भदौ २३ गते ।
धनुषामा दिउँसै रकम लुट्ने दुई युवक पक्राउ परेका छन् ।
धनुषाको लक्ष्मीनियाँ गाउँपालिका वडा नं. ६ निकाल बस्ने २० वर्षीय भरोशी भन्ने नरेश यादव र वडा नं. ४ बस्ने २३ वर्षीय सरोज दास पक्राउ परेको जिल्ला प्रहरी कार्यालय धनुषाले जनाएको छ ।
Sponsored
बुधवार लक्ष्मीनियाँ ४ सपही स्थित रहेको मेगा बैँकबाट स्थानीय ७५ वर्षीय राम दासले १ लाख ८० हजार रुपैयाँ निकालेकोमा बैँकबाट निस्केपछि दुबैजना लुटेर फरार भएका थिए ।
अपरिचित व्यक्तिले पैसा लुटेर फरार भएको सूचना प्रहरीमा आएपछि अनुसन्धान गर्दै जाँदा दुबै जना पक्राउ परेको प्रहरी उपरीक्षक बसन्त रजौरेले जानकारी दिए ।
प्रहरीले लुटिएको रकम मध्ये १ लाख ७५ हजार भरोशीको छाप्रो घरमा माटोमा खाल्डो खनी गाडेको अवस्थामा बरामद गरेको र सरोजबाट १ हजार ५ सय बरामद गरेको हो । यस्तै लुटपाटमा प्रयोग भएको ज १२ प ८५९३ नम्बरको पल्सर २२0 सिसिको मोटरसाइकल बरामद गरी थप अनुसन्धान थालेको प्रहरी उपरीक्षक रजौरेले बताए ।
Sponsored
