मधेश प्रदेश : भरुवा बन्दुक पड्किएर युवकको मृत्यु

टुडेपाटी-
वीरगञ्ज, बैशाख १ गते ।

भरुवा बन्दुक पड्किएर बारामा एक युवकको मृत्यु भएको छ ।

जिल्लाको जीतपुरसिमरा उपमहानगरपालिका–१६ डकाहा टोलका २८ वर्षीय सागर सिंजाली मगरको मृत्यु भएको हो ।

बुधबार राति साढे ११ बजे दुधौरा खोलामा माछा मारेर फर्कने क्रममा उनलाई गोली लागेको थियो । खोलामै रहेको सिरु घारीमा जंगली जनवारको शिकारको लागि थापेको भरुवा बन्दुकको पासोमा परेपछि बन्दुक पड्किएको प्रारम्भिक सूचना प्रहरीले पाएको छ ।

गोली लागेर गम्भीर घाइते भएका उनको उपचारको क्रममा वीरगञ्जस्थित नारायणी वयोधा अस्पतालमा मृत्यु भएको हो ।

प्रहरीले घटनास्थलबाट १ थान भरुवा बन्दुक बरामद गरेको छ । बन्दुक कसको हो, पासोमै परेर उनको मृत्यु भएको हो वा कसैले पड्काएको हो यस बारेमा अनुसन्धान भइहेको जिल्ला प्रहरी कार्यालय बाराले जनाएको छ ।