नाम र राजधानी जुराउन सफल भएको खुसियालीमा भोलि मधेश प्रदेशमा सार्वजनिक विदा

टुडेपाटी–
जनकपुरधाम, माघ ३ गते ।

मधेश सरकारले मंगलबार प्रदेशमा सार्वजनिक विदा दिएका छन् ।

आज बसेको प्रदेशसभा बैठकमा मतदान पश्चात स्थायी राजधानी र नामको टुङ्गो लागेपछि मधेश सरकारले खुशीयाली मनाउँदै भोली सार्वजनिक विदा दिएका छन् ।

मधेश सरकारका प्रवक्ता एवं अर्थमन्त्री शैलेन्द्र प्रसाद साहले सामाजिक सञ्जाल फेसबुकमा प्रदेशको नाम मधेश प्रदेश र राजधानी जनकपुरधाम भएकाले मंगलवार प्रदेशभरि सार्वजनिक विदा दिइएको जानकारी दिएका हुन् ।

सोमबार बसेको प्रदेशसभा बैठकबाट झण्डै चार वर्षपछि प्रदेशको नाम र स्थायी राजधानीको टुङ्गो लागेको छ ।

राजधानीका लागि भएको मतदानमा ९९ जनाले मत खसाउँदा ७८ जनाले जनकपुरधामको पक्षमा मतदान गरेका हुन् ।

त्यस्तै नामका लागि भएको मतदानमा ८० जनाले मत खसालेपछि नाम र राजधानीको प्रस्ताव दुई तिहाइ भन्दा बढीले पास भएको हो ।