पर्साबाट १ क्विन्टल गाँजासहित ७ जना पक्राउ

टुडेपाटी-
पर्सा, पुस १९ गते ।

पर्सामा लागुऔषध गाँजासहित ७ जना पक्राउ परेका छन् । पक्राउ पर्नेमा मकवानपुर हेटौंडा निवासी विजय तामाङ, लक्ष्मण सिटौला, प्रभात तामाङ, रामलाल गोले, धादिङ बस्ने निरज लामा, चितवन बस्ने सानुलाल तामाङ र पर्साका सखुवा प्रसौनी निवासी सहिद मियाँ रहेका छन् ।

विशेष सूचनाका आधारमा लागुऔषध नियन्त्रण ब्युरोबाट खटिएको प्रहरी टोलीले पर्साको लालपर्सा गाउँमा रोकी राखेको ना ४ ख ६५२५ नम्बरको ट्रकबाट १ क्विन्टल ५ किलो गाँजासहित उनीहरुलाई पक्राउ गरेको पर्सा प्रहरीले जनाएको छ ।

माल समान राख्ने ठाउँमा चेक गर्दा कालो त्रिपालले छोपी राखेको अवस्थामा गाँजाको चिप्पड बरामद गरिएको लागुऔषध नियन्त्रण ब्युरोका प्रवक्ता कृष्णकुमार महतले जानकारी दिए । उनका अनुसार ती सबै गाँजा विभिन्न रंगका प्लास्टिकले बेरेर ट्रकभित्र राखिएको थियो ।

पक्राउ परेका सातै जनाविरुद्ध थप अनुसन्धान थालिएको पर्सा प्रहरीको भनाइ छ ।