मंलगवाको प्लाई उद्योगमा आगलागी, कच्चापदार्थ जलेर नष्ट

टुडेपाटी-
सर्लाही, पुस २ गते ।
सर्लाही सदरमुकाम मंलगवामा जय बजरंग प्लाई इन्डष्ट्रिमा आगलागी भएको छ । विद्युत् तार सर्ट भएर बुधबार साँझ ७ बजे मलंगवा नगरपालिका–४ शिवसागर चोकस्थित प्लाई इन्डष्ट्रिमा आगलागी भएको हो ।

आगोराति साढे ८ बजे नियन्त्रणमा लिएको प्रहरीले जनाएको छ ।

मलंगवा नगरपालिकाको दमकल नभएकाले हरिवन नगरपालिकाबाट गएको दमकलले आगो नियन्त्रणमा लिएको थियो । मलंगवाको दमकल बिग्रेर बनाउनका लागि केही दिनअघि नै वीरगञ्ज पठाइएको बताइएको छ । हरिवनको दमकलसँगै नेपाली सेना, प्रहरी, सशस्त्र प्रहरी, स्थानीय बासिन्दाले आगो नियन्त्रणमा लिएका थिए ।

Sponsored

प्लाई बनाउने मेशिन स्थलबाट विद्युत् सर्ट भई अगलागी हुँदा उपकरणहरु र कच्चा पदार्थ जलेर नष्ट भएको प्रहरीले जनाएको छ । आगलागीबाट लाखौंको क्षति भएको अनुमान गरिए पनि बिहिवार बिहानसम्म क्षतिको यकिन तथ्यांक भने आइनसकेको जिल्ला प्रहरी कार्यालय सर्लाहीका प्रहरी प्रवक्ता प्रहरी नायब उपरीक्षक मदन कुँवरले जानकारी दिए ।